islamic-sources

  1. home

  2. article

  3. قصه یوسف زلیخا ورقه 102

قصه یوسف زلیخا ورقه 102

قصه یوسف زلیخا ورقه 102
Rate this post

مولوی غلام رسول عالمپوری

درد میرے کجھ ملکوں باہرے کون کرے اِتھ چارہ
ایویں روندی رہی زُلیخا رہندی حال آوارہ
دن مجلس وچ تپدی گُزرے رات دُکھاں وچ زاری
ایہا حال ریہا سو مُدت وچ فرقت دشواری
کدی کدائیں گھر دے اندر جے دردیں دل اکّے
ایہہ غم سوز وچھوڑے والا ہر گز جھل نہ سکے
کرے اجازت طلب عزیزوں سد عماری داراں
سیر کرن ول جنگل جاوے باندیاں نال ہزاراں
وچ اجاڑاں ناقہ اُتے رو رو نین ودھاوے
زخم پرانیاں درداں والا ہر دم ودھدا جاوے
یا لبھے اوہ وچ اجاڑاں دل دے نال ارادے
عشق سوکھالا ناہیں ہر گز اُسدے سخت تگاوے
جاں جنگل وچ صبر نہ آوے نیل ندی ول جاوے
کر کجھ سیر عمّاری پھیرے مُڑ ول گھراں سدھاوے
ایہہ قضّیے ایہو روناں ایہا حال اُداسی
ورھیاں کئی زُلیخا تائیں ملی نمول خلاصی
عجز حال رہی دل بریاں نین رہے دو وگدے
حال ملال برہوں دے جھُولے رہے جگر وچ لگدے
بلدی اگ نہ ٹھلّی اک دم کدی قرار نہ آیا
دائی کہے مِلا جگ دیتے یاراں یار خُدایا
دائی کرے دعائیں رو رو اللہ دے دربارے
اس بُڈھی دے عجز دُعاؤں اثر کھلا اکوارے
کرو غلام رسول دُعائیں وید ملے بیماراں
تے بیماریاں کٹ گوا دے یار ملاوے یاراں
ہُن تجویزاں تے تدبیراں واہ لا چیکا سبھے
فضل منگو جو فضل بغیروں دلبر مشکل لبھے
جاں طوفان کرم دا وگے روڑھ کھڑے دُکھ سارے
نہ اُمیدیاں تے غم ہاوے بیڑیاں پُور نگھارے