islamic-sources

  1. home

  2. article

  3. قصہ یوسف زلیخا ورقه 29

قصہ یوسف زلیخا ورقه 29

قصہ یوسف زلیخا ورقه 29
Rate this post

لکهاری: مولوی غلام رسول عالمپوری

ورقہ 31

کڈھن ایہناں مراد دلے دی قیمت نام دھرائی
ویہ درم مُل یوسف سندا حق دلالاں پائی
جے یعقوب پچھانے بھائیاں خبر نہ کائی
تے یاں کجھ زُلیخا جانے جان دھرے کڈھ سائی
یاں وچ مصر نواحی تک تک جھڑ جھڑ مرے لوکائی
لکھ لکھ جان فدا دیداروں تول ترازُو پائی
مالک کہے پیغمبر زادیو سند دیو لکھ کائی
ویچ لیا اساں عیبی بندہ قیمت حاصل پائی
لے شمعون قلم تے کاغذ لکھیا بیٹھ اتھائیں
ویچ دتا اساں یوسف بندہ مالک مصری تائیں
دعویٰ اُس دا کدی نہ کرئیے جھگڑا ہور نہ کائی
مُہر نبی یعقوب ایہناں تھیں چا وچ خط لگائی
بے دعویٰ لکھوایا مالک یوسف عبد بنایا
ایہہ کاغذ وچ مصر آخر یوسف دے ہتھ آیا
پھِر مالک نوں پاس بہایا یوسف دے سبھ بھائیاں
گلاں کجھ نصیحت کرن رل اِس نوں فرمائیاں
مت مالک کھا دھوکھا اُسدا دیکھ مَتاں چھل جاوے
نس گیا مُڑ ہتھ نہ آوے ساڈا نام گواوے
پا زنجیر سنگل گل اُسدے کھڑیو گھت کجاوے
ہو ہوشیار رکھیں جے اس نوں تاں قابو وچ آوے
پٹ تنبو چُک ڈیرا ایتھوں دیر کریں پچھتاویں
ایہہ چھلیا چھل جاسی دَم وچ اہ لگے غم کھاویں
ایہہ گل سُن زنجیر پوا دے مالک یوسف تائیں
ہتھاں وچ ہتھکڑیاں پائیاں گل وچ طوق ایذائیں
ٹوپ لباس نمد پہنایا بھائیاں بیٹھ اتھائیں
وِیر چلّے چھڈ یوسف رویا مِل ساں پھیر کدائیں
یوسف کرے بلند پُکاراں اٹک ذرا مل جاؤ
اے فرزندو باپ میرے دیو رحم میرے پر کھاؤ
یوسف بہت ندایا کردا اوہ ہو گئے رواناں
جاں یوسف نوں روندا ڈٹھا نیر چھُٹے کرداناں
یوسف کہندا مالک تائیں اذن ہووے مِل آواں
مالک اذن دِتا اُٹھ نسا یوسف طرف بھراواں
طوق گلے ہتھکڑیاں ہتھیں بیڑیاں پیریں پئیاں
یوسف دوڑے دوڑ نہووے اڈیاں اُچڑ گئیاں
کر کوشش نزدیک گیا تے نسے وِیر اگاہاں
یوسف دل دا دردیں بھریا زار رویا کر آہاں