islamic-sources

  1. home

  2. article

  3. قصہ یوسف زلیخا ورقه 39

قصہ یوسف زلیخا ورقه 39

قصہ یوسف زلیخا ورقه 39
Rate this post

لکهاری:مولوی غلام رسول عالمپوری

ورقہ 40

بدل اِک سفید سِرے تے اِس نُوں رکھدا سایہ
ہر منزل وچ خُوبیاں اُسدیاں مینوں انت نہ آیا
آخر حد مصر دی پہُتے منزل کٹ مراحل
آ لایا کرواناں ڈیرا نیل ندی دے ساحل
مالک ابنِ ذغر نے ڈیرا آن ندی پر لایا
بے قیمت گُل خنداں مصری ہُن وِکنے پر آیا
تِسدن روز جمعہ جاں مالک پُہتا مصر کنارے
دسویں ماہ محرم سندی کہن مؤرخ سارے
مالک کہندا یوسف تائیں چل حضرت وچ پانی
گرد غُبار سفر دھو بدنوں لاہ پوشاک پورانی
پاء لباس شہانہ یوسف آیوں مصر نواحی
اج مصر قربانی جاسی تیں پر فضل الٰہی
اُٹھ یوسف وچ نیل ندی دے لاہ جامہ جا وڑیا
فرشوں عرش گیا چمکارا نور فلک جا چڑھیا
سی تہ بند کمر اسمانی ہور ننگا تن سارا
پَوے جھلک وچ جرم فلک دے چمکے جیویں ستارا
نُور ثریا لُٹ لیا سُو وَقت غرارے دنداں
لعل لباں وچ برق درختاں نظر پوے رُو خنداں
زلف پریشاں رُخ پر جھلّی جمع ہوئے دن راتیں
خمّاں کمند زنجیریاں والے ناگ بچے وی گھاتیں
سنبل شاخ بنفشہ تازہ گھٹ ذرا مانندوں
نافہ ختن فدا سو واری اس ول وار کمندوں
دو زُلفاں رُخ جھل پیّاں سُو نیل ندی اُچھلائی
برق چمک وچ لب دے ظاہر جاں ساون گھٹ چھائی
تر تر تاریاں یوسف نیل خوشی وچ آیا
آب صفا وچ مچھیاں تر تر گردوں جوش رچایا
یارب ایہہ کیا صورت سوہنی اج وچ نیل سمائی
حُوت فلک وچ رشک پُکارے دائے دَریغ جدائی
بحری جنوراں وچ تِس دن روز خوشی دا آیا
سرطاناں سر طعن نہ مویاں جوش نہنگاں چایا
کر کے غسل ندی دے وچوں یوسف باہر آیا
سورج وانگ بدن دی چمکوں نور جگت وچ چھایا
آہے راویاں لکھّیا تِسدن دُھند فلک تے چھائی
سورج وچ بدل پوشیدہ جگ وچ گُم رُشنائی
بدن مبارک یوسف سَندا سورج وانگ چمکیا
اوہ اندھیرا ہویا سبھ زائیل مصر تمام دمکیا