islamic-sources

  1. home

  2. article

  3. قصہ یوسف زلیخا ورقه 43

قصہ یوسف زلیخا ورقه 43

قصہ یوسف زلیخا ورقه 43
Rate this post

لکهاری:مولوی غلام رسول عالمپوری

ورقہ 44
حاجت اساں خرید اسیدی مُل منگیں لے کائی
یا اِک دید کرا اس ویکھاں کیڈ جمال صفائی
مالک کہندا ویچ لواں اس ویچن قصد ہمارا
روز جمعہ کڈھ سودا کرساں ویکھ لوے جگ سارا
ہُن جاؤ مت اساں بُلاؤ جمعہ دوراڈا ناہیں
مل لیویا ویکھو اکھیں جے ایہہ شوق تساہیں
سُن مڑ گئے گھراں نوں سارے چاڑھے شوق ہلارے
بھَکھ بھَکھ تیز طلب دِیاں لاٹاں صبر جلائے سارے
اگلی فجر ہجوم خلایق آ کیتا دربارے
گرد محل طواف کریندے یوسف طلب نظارے
ظالم کڈھ قمر چا بردہ جھات گھتّاں اِک واری
ان ڈِٹھیاں دی رمز پیاری واہی برہوں کٹاری
ناز کمان کرشمیاں والی تیر دھرے وچ پردے
کردے عجز پلک وچ مردے بردے شوخ نظر دے
مالک ابن ذغر بے دردا کڈھ دِکھا اوہ بردہ
مصر تمام غلام نظر دا شہر گدا اس در دا
رُخ انور جے اس دلبر دا کدی ہُندا پے پردہ
غرق خجالت دی وچ ندیاں تردا آب گہر دا
آب گُہر عرق جبینوں قطرے ریس نہ کردا
تے اس چہریوں نور قمر دا طاقت تاب نہ دھردا
در یتم دندانے رشکوں اُسدا پانی بھردا
اک دیداروں ہوش رکھے ہتھ ایہہ کس کولوں سردا
تے مجروح فراق پلک وچ ویکھ تڑفدا مردا
اَرِنی اُنَظر دی تکراروں رسدا زخم جگر دا
لیا لوکاں وچ حُجرے یوسف مالک نے گھت پردہ
بندہ زردا اڑیاں کردا چہر ڈھکے دلبردا
تے لوکاں وچ شوقاں ذوقاں خودیوں حال ونجائے
کئی امیر فقیر ہزاراں اُلٹ چوپھیروں آئے
مالک ویکھ کہے کیہ ہویا خلق ہوئی دیوانی
یوسف کیڈ جہانوں باہرا خلقاں کیوں حیرانی
لکھ لکھ بندے صاحب سندے اُس دنیا وچ آئے
اک دوجے تھیں اعلیٰ دسے اک تھیں اک سوائے
پر یوسف وچ جذب تاثّر خبر نہ کتھوں آیا
ایہہ مالک دل پردہ چھایا اس نے مغز نہ پایا
جو اوہ حسن پیارا خلقاں یوسف تھیں دسیاوے
مالک طالب دنیا زردا اوہ تِس نظر نہ آوے