islamic-sources

  1. home

  2. article

  3. قصہ یوسف زلیخا ورقه 48

قصہ یوسف زلیخا ورقه 48

قصہ یوسف زلیخا ورقه 48
Rate this post

لکهاری:مولوی غلام رسول عالمپوری

ورقہ 48
پیوندیاں دِل رجّے ناہیں جے پیون سے ندیاں
ترہایاں دو لباں پکارن تیک ہزراں صدیاں
آ عشقا ہُن ویلا تیرا تیریاں نِت اُڈیکاں
عیب بھرے بیدرداں وانگوں چھوڑ نہ لاویں لیکاں
وچ دربار تیرے جند جائے جھل بلے اگ سینے
بھَکھ بھَکھ لاٹ کرے رُشنائی وچ پردیس زمینے
گھاٹیاں عشق اوکھیرے پینڈے راہ پوہ اِتھ سُوری
ہون حضوریاں پوندیاں پوریاں چلدیاں چال تُنوری
پردیاں دے وچ وسدیاں رمزاں ول لے جان جدائیں
میں قربان نہ چشم جھمکّاں روز قیامت تائیں
نور صبح وچ شب دے دامن جاں کھلن پر آیا
والشمس وضحھا تھِیں دھر نقش اکھیں وچ لایا
ویلا اج قریب ہویا ای عشق بشارت گھلّی
ہتھوں گیاں دلاں پر درداں لگی ملن تسلّی
یار وکیندا خبراں آیا قیمت پوے سوّلی
اج یوسف دا وِکنے ویلا لین زُلیخا چلّی
کوک پئی لے جاگ بپاری رہے نہ پچھوتاوا
ایہہ یوسف دا وِکنے ویلا حشرۃ دا دِکھلاوا
اِک مکان عجب خوش طرزوں صاف فراخ چنگیرا
مالک خوب سوار بنایا جس دا شان وڈیرا
وچ ستون رخامی کیتے زرّیں ہور سوارے
کر پیوند بلند مکانے جُڑے جواہر سارے
نال ستوناں مُورت موراں زیبا صورت چارے
چونجاں لعل زمرد دُنباں بازُو نقش نگارے
مار اوڈار دِلا نوچ بہندے زیب قلم دی کاروں
ویکھ طیُور شعُور گواون آن پون جھڑ ڈاروں
وچ پران زیبائش بھریاں رُڑھدی پھرے صفائی
گردن دی موزونی کولوں طرز صراحی پائی
پیراں دے وچ جانجھ عقیقوں رنگ قدم اوہ گورے
موراں پیر بھلے نقاشاں پیر نہیں ایہہ مورے
مروارید اکھیں جیئوں مشعل بھکھدیاں لاٹاں نوری
دُر یتیم پراں وچ لڑیاں جیس وچ خوبی پوری
نہ اوہ منگن چوگ کدائیں نہ اوہ بول اکاون
نہ دھر پیر نقوش سُتونوں روغن رگڑ گواون
چوب صندِل تھِیں کُرسی زیبا مالک نے بنوائی
ایڈک خوبی لوکاں تائیں ویکھن وچ نہ آئی