islamic-sources

  1. home

  2. article

  3. قصہ یوسف زلیخا ورقه 50

قصہ یوسف زلیخا ورقه 50

قصہ یوسف زلیخا ورقه 50
Rate this post

لکهاری:مولوی غلام رسول عالمپوری

ورقہ 50

سُن سُن کے آوازہ لوکاں سبھ گھر بار وسارے
زخم رسے دِل مصریاں لوکاں چڑھ مصری دی دھارے
دید نویں دی آس جیہناں نوں شوقاں ذوق کھلارے
پر جیہناں زخم چروکے دِل نوں اس دے راز نیارے
دھن دھن بھاگ اوہناں دے بھارے اوہ وچ دار قرارے
خرق حجب انوار ظُلم دے حال ڈِٹھے جیہناں سارے
پئی پُکار وکیندا یوسف چڑھیا جوش ہوائی
ذوق ندی وچ سینے مصریاں سُن موجاں وچ آئی
درد دِلاں وچ لہراں وگیاں ٹھاٹھ چھڈی دریائے
رُڑھیا مصر پیا ہڑھ برہوں داغ دِلاں وچ پائے
کردا پِھرے پُکار منادی خوب پیام سُنائے
سینے تھِیں کڈھ درد منداں دے دِل تے جگر اڈائے
اِکناں دے دِل پُرزے کر کر بھر بھر چشم چڑھائے
چشماں تھِیں کڈھ اشک وگائے تے وچ خاِک رلائے
خاکوں گرد ہوا اُڈائے چائے ابر پُچائے
کر قطرہ ول بحر سُٹائے دھر اصداف رکھائے
دُرّ دراری اشک بنائے گھر طیمُوس سٹائے
انت زُلیخا دے ہتھ آئے وچ قیمت خرچائے
گرد نواحی شہر گرائیں گھر گھر جوش رچائے
مصرے وِکدا دلبر شامی ویکھدیاں جند جائے
گھر مالک ول دوڑے آئے خلقاں قصد اُٹھائے
زاہد چھوڑ عبادت خانے کرن زیارت دھائے
گھت وہیراں خلق تَرُٹّھی خبر چوپھیرے ہوئی
زن مرداں ہر بِکراں توڑی گھر وچ رہیا نہ کوئی
اُلریا جگ ہُلارے سُن وِکنے دِیاں خبراں
بے صبراں دے حال کہاں کیہ بھُلّیاں زیراں زبراں
شاہ مصر لے خاصیاں تائیں جو خدمت وچ سارے
ہو اَسوار گیا جا وڑیا مالک دے دربارے
اِک ول مرد زناں اِک طرفے ہوئے کھڑے چوپھیرے
اِک پئے اِک بیٹھے نیویں اِک کھڑے دِل بیرے
باترتیب سوار صفاں سبھ دھر تلیاں پر جاناں
دِید سجن دیاں تانگھاں اندر بیٹھے مل مکاناں
کرسی طرف ستُوناں دوروں لوک نگاہاں کردے
یوسف اجے نہ حاضر آیا جس دلبر دے بردے
شاہ مصر فرمان کریندا مالک ابنِ ذغر نوں
خلق سبھے ہُن حاضر ہوئی لے آ اس دلبر نوں