islamic-sources

  1. home

  2. article

  3. قصہ یوسف زلیخا ورقه 54

قصہ یوسف زلیخا ورقه 54

قصہ یوسف زلیخا ورقه 54
Rate this post

لکهاری:مولوی غلام رسول عالمپوری

ورقہ 54
بیٹھ لون دیو کُرسی اتے پردے جاں اُٹھا
نیڑے دِید کرن دا ویلا جے تُساں شوق سوائے
تاں یوسف نوں نال آرامی کُرسی طرف لیائے
اگے پچھے پکھیاں والے نالوں نال سدھائے
جاں مالک نے کُرسی اُتے یوسف آن بٹھایا
بُرقہ چایا گھُنڈ اُٹھایا دلیں اُلنبہ لایا
جاں اوہ صورت ظاہر ہوئی چھیک پئے وچ سنگاں
شمع بلی پر جلے تڑفدیاں اندر شوق پتنگاں
جوش اُٹھا پئی سبھ خلقت جاں وچ شوق ہُلارے
چوبداراں دیاں جاناں گئیاں روکدیاں وچ کارے
صبر گئے دِل ہتھوں چھُٹے نعرے پئے ہزاراں
حشر نمونہ مصر نواحی گئیّاں دیس پُکاراں
پہلی وار ویکھیندیاں کئیّاں جان گئی اِک چیخوں
دِل وچ سینیاں بریاں ہوئے لٹک برہندی سیخوں
زہرہ وَرے فلک دے کنبے زخمی ویکھ مریخوں
لعل بلیندے چہرے مصریاں زرد ہوئے زرنیخوں
گھلدے پئے مواد طلب دے کیتے نضج طبیخوں
گُم گئے پڑھ دفتر مصری ہاروتی تاریخوں
طاقت ہار دتی میدانے ویکھدیاں دی اکھیں
اُس دِن مُل نظر دیاں واہاں ہتھ نہ آون لکھیں
شمع جمال فروزاں والی لاٹ بلی جھل ککھیں
جھل دلا سر وَرہدیاں ضرباں پھیر دَریغ نہ رکھیں
اِکو وار ڈٹھا چمکارا ویکھدیاں زن مرداں
اوہ ظاہر پر اکھیں لُکیاں ہو زخموں سرگرداں
ایڈک زخم اکھیں وچ واہے چمک حُسن دیاں کرداں
رَس رَس خون دِلاں وچ وسیا نال برہوں دِیاں درداں
کون بندہ جو ثابت ریہا داغ لگے وچ دِل دے
زن مرداں نہ ہوش دماغیں نہ بولن ہَلدے
سبھ چپ چان بُتاں دی صورت جے لکھ چین چگل دے
لامعہ برق حُسن دی تیغوں زخم وجے نہ ملدے
دید اولار سہار نظر نوں ویکھ دِلا اِک واری
سے سے وار پُکار کریندیاں چشم نکھولے باری
کیہ طاقت ایہہ چشم نکاری ضرب سہے سر بھاری
لکھ غنیمت ٹھاٹھ حُسن تے جی جاوے بلہاری
شکل مبارک یوسف والی ذبح گئی کر لوکاں
نین چمکدے تاریاں وانگوں تیز ایہناں دِیاں نوکاں