islamic-sources

  1. home

  2. article

  3. قصہ یوسف زلیخا ورقه 57

قصہ یوسف زلیخا ورقه 57

قصہ یوسف زلیخا ورقه 57
Rate this post

لکهاری:مولوی غلام رسول عالمپوری

ورقہ 57

ایہہ ندایاں سُنیاں یوسف وچ دِل دے شرمایا
صاحب میرا جانی مینوں جس نے آپ بنایا
شیشہ ڈٹھا یوسف تائیں یاد دِلے وچ آیا
کنب گیا سُن نین وگے دو ساون چشم وسایا
سر نیویں فرمایا رو رو اللہ دی وڈیائی
بس پکارن والا بھائی نہ کر وادھا کائی
میں ہاں بندہ مالک سندا یوسف کرے اِشارت
ایہ پُکار پُکار ظاہر جس دی ایہہ عبارت
کون خریدے عاجز بندہ پردیس نتاناں
وچ غماں دلگیراں حیرت جس دا حال رنجاناں
بے طاقت نتھاواں بے دِل فِکریں وقت وِہاناں
جس جیہا مسکین نہ کائی آخر قبر ٹکاناں
سُن کے کہے پُکارن والا ایہہ گل لائق ناہیں
میں ایہہ تیریاں وصفاں اندر کہاں نمول کدائیں
شان تیری سبھ جگ توں عالی تے توں نقصوں خالی
کراں پکار تیرے حق لایق عالی صفتاں والی
سُن فرمایا دوجی واری جے ایہہ کہیں نہ بھائی
سچی گل پُکار جگت وچ جس وچ نقص نہ کائی
کون خریدے بندہ جس پر لُطف الاہوں آہی
ابنِ النبی دا بیٹا ابن خلیل اللّٰہی
کردا عرض پکارن والا جے ایہہ کراں پُکارا
تینوں پھیر خریدے کیہڑے خوف کرے جگ سارا
وحی کرے رب یوسف تائیں رہ خاموش پیارے
ظاہر کرساں قدر تیرا اج فضل میرے نے بھارے
مُڑ مُڑ کرے پکار منادی اوہا لفظ پُکارے
مُشتریاں دے دِل شرماندے کون اوّل دم مارے
جتنی قیمت ظاہر آکھاں مل نہیں اس والوں
کون اوّل جو کرے دلیرں مُل کرے اس مالوں
تد نوں بدرہ اشرفیاں دا گاہک اِک لیایا
گنتی وچ ہزار ایہا ای یوسف طلب سٹایا
پہل ہوئی ہُن خلقت دوڑی مُل خریدن ساری
ہر طاقت وچ عرض لیائے شور پیا یکباری
ہر ہر دِل وچ یوسف سندا شوق پیا سو بھارا
زن مرداں ہر حاضر مالوں لگے کرن پکارا
بُڈھی اِک مسکین بے چاری اٹی سوت لیائی
جے اتنے نوں آوے یوسف دیو عرض سُنائی
اس صورت دے معنیاں مینوں کر مجبور جھکایا
میں خود دِل دا واہ مٹایا آندی سب سرمایہ