islamic-sources

  1. home

  2. article

  3. قصہ یوسف زلیخا ورقه 59

قصہ یوسف زلیخا ورقه 59

قصہ یوسف زلیخا ورقه 59
Rate this post

لکهاری:مولوی غلام رسول عالمپوری

ورقہ 59
بَازِغہ

بازغہ نام دسے اِک عورت سرور مصر نواحی
عادیاں دی وچ قوم اُسی دی سرداری تے شاہی
پہلی عمر کواری رعنا سرور چمن دا پورا
زُہد لُٹے تے صبر لٹاوے اُس دا ناز نہورا
جدوں نقابوں اکھیں کھولے تیر چھُٹن دو غمزے
بھواں کماناں چشم دو ناوک آب نشہ وچ رمزے
اوہ دو نین اُداسیاں والے مستی تھِیں متوالے
ہے وَل وگدی کاری لگدی وانگ غضب دے بھالے
ساقی نین خماریاں والے پُر پُر دین پیالے
ابرُو جھُکے کماناں گوشے تھوڑا فرق رچالے
دِل سنگین ایہناں دی تریوں رسمس کے تن گالے
ایہ دُگاڑا جین سر وجے اوہ نہ سُرت سمھالے
زُلف آویزاں خال مقابل معنیاں مغز نکالے
حل نتائج تے اقلیدس نقطے تھِیں خط ڈالے
لباں دوویں تر خون ڈُبائیاں دوویں قاتل خونی
حوراں وصف سُنی تُدھ ہوسی چہریوں اوہ موزُونی
پلک دو ناگ برہوں دِیاں سوہنیاں اکھّیاں والی
چُھٹی وار کرشمیوں بے وس پھیر مُڑے کد خالی
ناز وراں دی گردن اُتے پیر دھرے لکھ واری
تے شب یَلدا زینت کارن منگے زُلف اُدھاری
نور رُخوں لشکار دنداںتھِیں لین اُدھار سیّارے
قوس قزح دو ابُرو اگے کھاوے جھول ہُلارے
لعل بلے رُخ بدر منور دند چمکن تارے
لباں شفق وچ سلک سیّارہ سورج دو رُخسارے
شمع رخوں پروانیاں وانگوں جھڑ جھڑ مرن اُڈارُو
زخم کرشمیوں جیں ول کُھسّے اُس دا کجھ نہ دارُو
بینی بلے النبہ آتش جلے نظر پر سڑ کے
چُبھے نظر دی نوک جگر نوں دِل دھڑکے دُکھ رڑکے
زُلفاں ناگ سیاہاں ظالم ماندریں کٹ کھاون
جنگاہیں میدان برہوں دے کار کمند لیاون
مشاطہ سو منتر پڑھ کے زلفاں نوں ہتھ پاوے
اجے ڈرے مت اُنگلیاں نوں ظُلم کرے کٹ کھاوے