islamic-sources

  1. home

  2. article

  3. قصہ یوسف زلیخا ورقه 70

قصہ یوسف زلیخا ورقه 70

قصہ یوسف زلیخا ورقه 70
Rate this post

لکهاری:مولوی غلام رسول عالمپوری

ورقہ 70

در بیان نسبِ زُلیخا رضی اللہ تعالیٰ عنہا و دیدن اُو بحال نَوم
جمال یوسف را بہفتم سا لگی از عُمر خود و از خود رفتن بمجرد مشاہدہ

گھت وچ جام طلب دے ساقی دو گُھٹ شوق شراباں
سیل فنا وچ رُڑھیا جاواں چھُٹے جان عذابوں
تے ایہہ جام دُکھاں دا بھریا لبوں نہ لاہاں مُولے
لکھ لکھ خوشی غلام رسولے جے محبوب قبولے
دا مادر دا سر کُوکاں کردی رات فراقاں والی
آ یارا میں وچ اُڈیکاں جان تے سُرت سمھالی
جھولا جوش برہوں دا مجھلا واؤ ٹھنڈی لے آیا
چا وچ خواب لُٹا ہوشیاراں دلیں النبہ لایا
ہستی سوز برہوں دیاں لاٹاں مشکل بھُل دیاں جاناں
تن من ساڑ شمع تے آخر لاٹ چھڈے پروانہ
جل جل جان قلم دیاں نوکاں پُرزے ہون زباناں
حرف لکھن یا کہن کدائیں نال کلام بیاناں
شاہ طیموس بڑا سدواوے مغرب وچ دیارے
مُشتری درے فلک دے خادم اُسدی ٹہل گزارے
تے سلطان ولایت والے اُس نوں سیس نواندے
دن تے رات رہن وچ خدمت خوف دِلاں وچ کھاندے
وانگوں بردے خدمت کردے قہر غضب تھیں ڈردے
راج جیہناں دے ملکاں اندر اُس دا ہالا بھردے
اِک دُختر اس نام زُلیخا پُر انوار صفائی
حُوراں اُسدیاں خدمتگاراں پریاں چیز نہ کائی
طیمُوسے نوں بہت پیاری ویکھے سو سو واری
اُس دی خدمت خاطر داری اُس دی فرحت بھاری
نازیں پالی خوشیاں والی غموں نہ پائیاں ساراں
تے وچ عشرت عیش بہاراں کردی ناز ہزاراں
دائِیاں گود کھلندی نازک عُمر پُنی ست سالے
ودھ ودھ مارن تاریاں تائیں نین دو نازاں والے
لُعبت بازی رات دناں وچ کار رہیا دن کائی
ایدوں بعد برہوں پھٹ گھتی جاں نیندر وچ آئی
ہو چکیاں اوہ ناز بہاراں جان اِک رات دِسائی
پھر ساعت ہر گُزری جاندی نظر قیامت آئی
جس راتیں ول پئے کمندیں اس شب دے سُن کارے
ندیاں دے سر چاء فلک نے نقش لگائے تارے
رنگینی اجرام فلک دی پانیاں دے وچ سارے
گھل گھل کے وچ وہندیاں ندیاں لہر چھڈی لشکارے
کالی رین جھلکدے تارے وانگوں زخم عشاقاں
برگ گُلاں پُر عرق تریلوں وانگ متھے مشتاقاں
بُرقے لاہ رُخاں تھیں تارے ڈُب ڈُب نور جھلکدے
زخم او گھاڑ وِکھائے ظاہر اندر جرم فلک دے
نور بحر وچ غوطے کھاندے مارن جوش ہولاراں
چھن چھن نور ورہے وچ ہینیاں ہر شب زندہ داراں
بزم افروز طرب چڑھ زُہرہ چمکے چرخ کنارے
چاڑھ قلم سر نقش عطارد لیکھ لکھے دُکھ بھارے
اکبر نحس زحل دے جگروں چھُٹے خون فوارے
موت احمر رت رنگی رس مس نین برہوں دُکھیارے
پنجم چرخ مریخوں بھَکھ بھَکھ لاٹ چھڈن رُخسارے
رسیا رنگ سہیل یمن تھیں رس وسیا بلغارے
قبلہ قطب فلک دا مرکز کرن طواف سیّارے
فرقدیناں قربانی گیاں دلر دے دربارے
لاٹ شباب چھُٹی وچ کاروں ویریاں دے سر ساڑے
حکم ازل دے لوح محفوظوں نقش قدرے جھاڑے