islamic-sources

  1. home

  2. article

  3. قصہ یوسف زلیخا ورقه 78

قصہ یوسف زلیخا ورقه 78

قصہ یوسف زلیخا ورقه 78
Rate this post

لکهاری:مولوی غلام رسول عالمپوری

ورقہ 78

دھوں آہیں گھٹ لیکھ سیاہی رات ایہا سو کالی
کرے تلاش علاج قیاسوں درد قضّیاں والی
یاد پیاسو کل دا حالا رسیا زخم ودھیرا
تیر کُھبا سُو کڈھن لگی ہویا گھاء گھنیرا
کل دے زکم لگائی مرہم چھیک گئے پے دونے
جھولی کھول کھڑی دُکھ منگن طالع رزق وہونے
مشتریوں ٹُٹ ملی زحل نُوں قدر بلند اقبالی
آہیں سرد غماں دی بھریاں جس دے درے سوالے
اوہا تیر برہوں دا سلے جگر چھڈے رت لہراں
درد دُکھاں نے تن من اندر کُٹ کُٹ بھریاں زہراں
چھاتی کٹے متھا ٹھوکے پنجے وال اڑاوے
اکھیں میٹ دندیڑک وَٹے دندیں دند گھساوے
پیر پسارے باہاں کھولے دِل وچ فال وچارے
کدی اُٹھے کدی بیٹھے روندی آہ دریغ پُکارے
کدی سرہاندی کدی پواندی لِٹ لِٹ غشیاں کھاندی
صبر قرار نہ آوے دِل نُوں نین ملے کُرلاندی
جاں اکھیں نُوں وہندیاں دیکھے رو رو کرے دُہایاں
بس اے ظالم آپے پہلے کیوں نیند وچ آئیاں
دگو رگو ہُن روواں عمراں جے نہ ملن دوائیں
چشمہ خون وگے وچ قبرے روز قیامت تائیں
بے آرام قراروں خالی ٹھور کہے پیشانی
واہ حیرانی سرگردانی مفت گیاں ہو فانی
رات گئی کجھ انھیں تگاویں جوش بھریدیاں کُوکاں
عشق دھری چنگیاڑی دِل تے ہجر لگائیاں پھُوکاں
اوہو صورت حاضر کر کے اگے چشم خیالاں
سر زانُو دھرا کتے بیٹھی دِل گریاں تن نالاں
درد غماں دے دفتر خانے دھر بیٹھی لے اگے
کرے خطاب پیارے تائیں تیر جیہدے چھُٹ وگے
اے میرے محبوب پیارے اے مقصُود دِلاں دے
مینُوں روڑھ وگاون والے تیرے زخم نہ جاندے
اے میرے شب تار لوٹیرے اے وچ دید سہاندے
ویکھ تیرا رُخ نور دمکدا تارے جُنبش کھاندے
اے وچ درد پئی دیا وید اُلٹ لئی دیا چورا
کھوہ گئیوں لے موہ گیوں لے باقی اجے نہورا
اے وچ خواب تیرے دیداروں دو عالم مُل تھوڑا
قامت تیرا وانگ قیامت مِثل نرکھدا جوڑا