islamic-sources

  1. home

  2. article

  3. قصہ یوسف زلیخا ورقه 89

قصہ یوسف زلیخا ورقه 89

قصہ یوسف زلیخا ورقه 89
Rate this post

مولوی غلام رسول عالمپوری

ورقہ 87

اَسُّو
اَسُّو آس دراڈی مینوں روندیاں جُگ وِہانے
سوہنے والیاں اکھیں اوہا کوہندیاں زور دھگانے
دن روواں میں راتیں جھوراں تازے کراں سیاپے
دن ماتم میں رات قضیّے ایہہ دوزخ سر جاپے
جے ہے عشق تیرا بھلیائی مُل بہشت نہ کائی
جے ہے بُرا نہ دوزخ حاجت کافی اجر جُدائی
٭٭٭
کتک
کتک کٹک برہوں دے دھانے مینوں لُٹ سدھائے
اوہ دلبر دے نین ترکھے وگ دل کاری آئے
دیکھ لواں ہُن طالع اپنے مُڑ کد ملے پیارا
کر گھائل چھل جاناں دم وچ ایہہ اُس دا ورتارا
کر پھیرا دُکھ لمے ہوئے مَر کھپیاں وچ دوری
سینہ پُرزے جگر شرارے تن من ہویا چوری
٭٭٭
مگھر
مگھر ماہ عمل دے پالے تیریاں واہ رضائیں
مُدّت جلی بلی میں دردیں ہُن تے آ مل جائیں
رُخوں نقاب اُتار کرم تھیں سُفنے روپ دیکھائیں
کِتیوں گھیر گھڑی بھر پہلے نیند اکھیں وچ پائیں
میں تیری توں کس تھیں نسّیں تھیں کس تھیںگھتّیں پردہ
پاس ہوندوں ایہہ درد سُنیندوں واہ دردا واہ دردا
٭٭٭
پوہ
پوہ مہینہ ٹھنڈا چڑھیا جِگر ودھیرے سڑیا
لمی رات فراقاں والی یار نہ مُڑ گھر وڑیا
گھر میرے توں پیر نپاویں ویکھ دُکھاں دیاں آہاں
ایہہ آخر دُکھ لائے توہیں ہُن کیوں ہٹیں پچھاہاں
دید توہیں دُکھ تیرا مینوں میں تیری تُوں میرا
توہیں دولت توہیں مالک توہیں آپ لُٹیرا
٭٭٭
ماگھ
ماگھ مگھائی دل دی آتش جان گئی ہو بیرے
جیوں جیوں کراں علاج دُکھاں دا تِیوں تِیوں ہون ودھیرے
کر گھائل تُوں نہ مُڑ ملیا تے ایہہ درد نہ مُکے
کاٹھ ہویا سُک تن من میرا ظالم نین نہ سُکے
جے اِک وار مِلیں میں پُچھاں بعد سلام دُعائیاں
توں ایہہ نین میرے وچ کتھوں ندیاں توڑ وگائیاں
٭٭٭
پھگّن
پھگّن ماہ فراقوں روندی پئے اکھیں وچ روہے
واہ واہ عشق تیرے نے مینوں دُکھ دتے سُکھ کھوہے
ہُن ایہہ اکھیں سوندیاں ناہیں نیند گیوں لے نالے
آن ویکھا اوہ شعلے نوری کھُلیاں نینداں والے
دل دا خون اکھیں تھیں وہندا غم دیاں وگن کٹاراں
وچ قضّیاں تیریاں روندی گئے مہینے باراں
ایسے حال زُلیخا تائیں سارا سال وِہایا
نہ اوہ کُھلیاں نینداں غالب نہ اوہ یار دسایا
جریا برس دے غم بھارا طاقت رہی نہ زورا
اکھیں پک رہن وچ لالی بدن گیا ہو کھورا
اِکو سال زُلیخا تائیں غم دے سوز وبالوں
دوزخ دے وچ کٹن نالوں بڑا ہزاراں سالوں
گُزریا سال اکاہرے غم دا ہُن دوہرے دی واری
وگی کلام دلوں دو حرفی طالع فال وچاری

ہو ثابت تے صابر شاکر سر پر سبھ غم چایا
ہُن طاقت نے حالت بدلی سڑ بل حاصل ہویا
نت کرے فریاداں آہیں اللہ دے دربارے
تاں وہ یاز ملے وچ سُفنے ویکھ لواں دیدارے
قوس زُبانوں تیر دُعائیں دن وچ لکھ لکھ واہے
تاں اک تیر نشانے وجا کُوک سُنی درگاہے
٭٭٭