islamic-sources

  1. home

  2. article

  3. کافیاں بُلھے شاہ: کافی 15-10

کافیاں بُلھے شاہ: کافی 15-10

کافیاں بُلھے شاہ: کافی 15-10
Rate this post

کافیاں بُلھے شاہ: کافی 15-10
اکھاں وچ دل جانی پیاریا
کیہا چیٹک لایا ای
میں توں وچ ذرا نہ جُدائی ۔۔۔۔۔ ساتھوں اپڻا آپ چھپایا ای
اکھاں وچ دل جانی پیاریا
کیہا چیٹک لایا ای
مجھیں آئیاں یار نہ آیا۔۔۔۔۔پُھوک برہوں ڈؤں لائیا ای
اکھاں وچ دل جانی پیاریا
کیہا چیٹک لایا ای
ہیں نیڑے مینوں دور کیوں دسنائیں ۔۔۔۔۔ ساتھوں اپڻا آپ چھپایا ای
اکھاں وچ دل جانی پیاریا
کیہا چیٹک لایا ای
وچ مصر دے وانگ زُلیخا ۔۔۔۔۔ گُھنگھٹ کھول رُلایا ای
اکھاں وچ دل جانی پیاریا
کیہا چیٹک لایا ای
شوہ بُلھے دے سر پر بُرقع ۔۔۔۔۔ تیرے عشق نچایا ای
اکھاں وچ دل جانی پیاریا
کیہا چیٹک لایا ای
اوکھے لفظاں دے معنے
چیٹک: فکر مندی، پریشانی؛ پُھوک: ساڑ؛ برہوں:فراق؛ ڈوں: نہ بُجھڻ والی پیاس، تریہہ۔
12
اُلٹے ہور زمانے آئے ۔۔۔۔۔۔۔۔تاں میں بھیت سجڻ دے پائے
کاں لگڑ نوں مارن لگے
چِڑیاں جُرّے ڈھائے
اُلٹے ہور زمانے آئے ۔۔۔۔۔۔۔۔ تاں میں بھیت سجڻ دے پائے
گھوڑے چُگڻ اروڑیاں اُتے
گدوں خود پوائے
اُلٹے ہور زمانے آئے ۔۔۔۔۔۔۔۔ تاں میں بھیت سجڻ دے پائے
اپڻیاں وچ اُلفت ناہیں
کیا چاچے کیا تائے
اُلٹے ہور زمانے آئے ۔۔۔۔۔۔۔۔ تاں میں بھیت سجڻ دے پائے
پیو پُتراں اتفاق نہ کائی
دھیاں نال نہ مائے
اُلٹے ہور زمانے آئے ۔۔۔۔۔۔۔۔ تاں میں بھیت سجڻ دے پائے
سچیاں نوں پئے ملدے دھکے
جھوٹھے کول بہائے
اُلٹے ہور زمانے آئے ۔۔۔۔۔۔۔۔ تاں میں بھیت سجڻ دے پائے
اگلے جا بنگاہ لے بیٹھے
پچھلیاں فرش وچھائے
اُلٹے ہور زمانے آئے ۔۔۔۔۔۔۔۔ تاں میں بھیت سجڻ دے پائے
بھُوریاں والے راجے کیتے
راجیاں بھیک منگائے
اُلٹے ہور زمانے آئے ۔۔۔۔۔۔۔۔ تاں میں بھیت سجڻ دے پائے
بُلھیا حُکم حضوروں آیا
تِس نوں کوڻ ہٹائے
اُلٹے ہور زمانے آئے ۔۔۔۔۔۔۔۔ تاں میں بھیت سجڻ دے پائے
اوکھے لفظاں دے معنے
لگڑ: اک کالی اکھ والا شکاری پرندہ؛ جُرّے: نر باز؛ خود: ہرا گھاہ؛ بھوریاں والے: سکھ گوریلے جیہڑے موڈھے تے بھرا رکھدے سن؛ بنگاہ: فوج دا پچھلا حصہ جیس وچ سامان ہوندا ہے، وانس دا سوٹا جیس نال ڈکا لایا جاندا ہے؛ فرش وچھاؤڻا: سواگت کرنا
13
آؤ فقیرو میلے چلئیے عارف کا سُڻ واجا رے
انہد شبد سڻو بہو رنگی تجئے بھیکھ بیاجا رے
انہد واجا سرب ملاپی نِرویری سرناجا رے
میلے باہجھوں میلا اوتر رُڑھ گیا مُول ویہاجا رے
کٹھن فقیری رستہ عاشق قائم کرو من بھاجا رے
بندہ رب بھیواک بُلھا پڑا جہان براجا رے
اوکھے لفظاں دے معنے
عارف: معرفت والا، صوفی؛ واجا: باجہ، یا آواز؛ شبد: لفظ، کلمہ؛ بہو رنگی: کئیاں رنگاں والا؛ تجیئے: چھڈ دئیے، ترک کر دئیے؛ بھیکھ: بھیس؛ پیاجا: دھوکا، فریب؛ سرب ملاپی:ساریاں نوں ملاوڻ والا؛ نِرویری۔ ویر توں پاک؛ سرناج: سرناچا، چھوٹی سرنائی، پائپ کلیرین؛ میلا: ملاپ؛ اوتر: ابتر، خالی؛ مُول: اصل زر، کاروبار وچ لایا اصل سرمایہ؛ ویاجا: خریدیا ہویا سامان؛ بھیو: ہو گیا، بڻ گیا؛ براجا:نراجا، بنا راجے دے
14
آؤ سیو رل دیو نی ودھائی
میں بر پایا رانجھا ماہی
اج تاں روز مُبارک چڑھیا ۔۔۔۔۔ رانجھا ساڈے ویہڑے وڑیا
ہتھ کُھونڈی موڈھے کمبل دھریا ۔۔۔۔۔ چاکاں والی شکل بڻائی
آؤ سیو رل دیو نی ودھائی
میں بر پایا رانجھا ماہی
مُکٹ گُواں دے وچ رُلدا ۔۔۔۔۔ جنگل جوہاں وچ کِس مُل دا
ہے کوئی اللہ دے ول بُھلدا؟ ۔۔۔۔۔ اس حقیقت خبر نہ کائی
آؤ سیو رل دیو نی ودھائی
میں بر پایا رانجھا ماہی
بُلھے شاہ اک سودا کیتا ۔۔۔۔۔ پیتا زہر پیالہ پیتا
نہ کُجھ لاہا ٹوٹا لیتا ۔۔۔۔۔ درد دُکھاں دی گٹھڑی چائی
آؤ سیو رل دیو نی ودھائی
میں بر پایا رانجھا ماہی
اوکھے لفظاں دے معنے
ودھائی دیڻا: مبارک باد دیڻا؛ بر۔ویاہ دا ساتھی؛ مُکٹ: تاج؛ گواں: گوہیا؛ جُوہاں: جنگل بیلے؛ لاہا: منافع؛ ٹوٹا: نقصان؛
15
ایسا جگیا گیان پلیتا
نا ہم ہندو نہ ترک ضروری
نام عشق دے ہے منظوری
عاشق نے ہر جیتا
ایسا جگیا گیان پلیتا
ویکھو ٹھگاں شور مچایا
جمنا مرنا چا بڻایا
مُورکھ بُھلے رولا پایا
جس نوں عاشق ظاہر کیتا
ایسا جگیا گیان پلیتا
بُلھا عشق دی بات نیاری
پریم والیاں نوں بڑی کراری
مُورکھ دی مت ایویں ماری
واک سُخن چُپ کیتا
ایسا جگیا گیان پلیتا
اوکھے لفظاں دے معنے
جگیا: روشن ہو گیا؛ گیان: علم، معرفت؛ پلیتا: دیوے دی بتی، فلیتا؛ تُرک: ہندوستان دے لوک دریوں آوڻ والے سب مسلماناں نوں تُرک آکھدے سڻ؛ ہر: رب ہر؛ جیتا:رب نوں پایا، ایسدا دا مطلب ساری مخلوق وی دسیا گیا ہے؛ نیاری: وکھری، عجیب؛ واک: بول۔