islamic-sources

  1. home

  2. book

  3. سورت البقرہ (مدنی) پہلا حصہ

سورت البقرہ (مدنی) پہلا حصہ

  • وچار پبلشرز
سورت البقرہ (مدنی) پہلا حصہ
Rate this post
description book specs comment

بسم اللہ الرحمن الرحیم

الف لام میم

بے شک! ایہہ کتاب ہدایت متقیاں دے واہتے اس وچ،غیب اُتے
ایمان جنہاں دا ‘ پکے ہین نمازی جیہڑے،ساڈے دتے وچوں دیندے۔
تے اوھبی ایمان جنہاں دا تیرے ول اساڈی گھل تے تیرے نالوں پہلاں
دی وی گھل اُتے نالے چھیکڑ نوں وی منن۔(٤)
اوہوا لوک ہدایت اُتے رب اپنے دے ولوں،اوہناں دی ای بیجی پھلنا۔
کفروناں نوں اک بروبر دھمکائیں یاں نہ دھمکائیں،اوہ نہ آکھے لگن والے۔
اللہ ولوں بند اوہناں دے دل وی کن وی،تے اکھیاں دے اگے پردے،
مار بڑی اوہناں نوں پینی۔
لوکاں وچ ای اوبھی جیہڑے اللہ نوں تے چھیکڑ دن نوں منن دی گل کر دے
‘پرناہ اندروں مومن۔
چالاں چلدے نال اللہ دے،تے ایمان لیایاں نال اوہ،بے خبرے ہین اس
توں’ اپنیاں ای چالاں دی پھیٹ اونہاں کھانی۔
روگ اونہاں دے اندریں جیہڑا’ اللہ اس نوں ہور ودھایا’بھا اوہناں دے مار
دکھاں دی،کوڑ کمانوں۔
انج دے لوکاں نوں جد کہیے’دنیا وچ فساد ناہ بیجو’آکھن اسی سدھار نہارے۔
حالاں اوہ نیں بے شعور فسادی۔(١٢)
اوپرے لگدے لفظ :
٭متقیاں۔ نیک لوکاں، ٭ واہتے۔واسطے، ٭ دتے وچوں دیندے۔صدقہ خیرات کردے، ٭اوبھی۔ اوہ وی، ٭گھل ۔گھلی ہوئی، نازل ٭چھیکڑ۔ اخیر، آخرت ٭چھیکڑ۔ قیامت دا دیہاڑا، حساب کتاب دا دن، ٭بیجی پھلنا۔ چنگے کماں دا اجر ملنا ٭کفروناں۔ جیہڑے رب دیاں گلاں نوں نہیں من دے،

اوہناں نوں جے ایہہ مت دئیے’ لوکاں وانگ ایمان لیاؤ،آکھن کیہ ایمان لیائیے
مورکھ لوکاں وانگوں،سچ تاں ایہہ ہے آپ اوہ مورکھ،سمجھوں کور
مومن لوکاں نوں جد ملدے ‘تاں کہندے ایمان لیائے’پر شیطانی ٹولے رل
کے آکھن ہے واں نال تہاڈے،اوہناں نال بکھیڑے کرئیے اللہ اوہناں
نوں سِجھ لیسی،ہور ودھا کے انھے واہ دی داغ تڑائی(١٥)
ایس طرح دے لوکاں نے سدھ راہی چھڈی تے گمراہی وٹی،ایس بپارے ناہ
اوہناں نوں کوئی کھٹی،ناہ سدھ راہیاں وچ اوہ ہوئے۔
ہے مثال اوہناں دی انج وی’جیوں اک بندہ اگ بھخا کے گردے نوں
رشنائے۔
اللہ اونہاں دی بینائی کھوہ لے جائے تے اوہناں نوں نھیرے دے ای
مڑوس پائے،ویکھن توں بے کار بنائے۔
ڈورے،کنگے،انھے (لوکی) کھنجیاراہ ناہ پیندے۔
اسماناں توں وسن والے بدل دی وی گل ڈھکدی اے،اس وچ نھیرا،کڑکی،
چمکی،موتوں ڈر دے، کڑ کڑ سن کے، لوکی کناں نوں انگلاون اللہ دے
گھیرے وچ کافر(کن انگلایاں کی بن دا اے)
جا پے چمکی لو اکھیاں دی ہن کھوہی ہن کھوہی چانن ہویاں پیر اوہ پٹدے،
نھیرا ہووے تے رک جاندے اللہ چاہے تے کھس لے نیں،سن وی،تک
وی،اوہ ہر شے تے قادر۔(٢٠)
اوپرے لگدے لفظ :
٭سجھ لیسی۔ نبڑ لوے گا، ٭واغ تڑائی۔ آکھا نہ مننا، پُٹھے راہ پینا، ٭کھٹی۔ فیدہ ٭ گردا۔ رات دا ہنیرا ٭ انگلاون۔ کناں وچ اُنگلیاں دے لین۔ ٭کھس لے۔ کھوہ لوے

لوکو،کرو عبادت رب دی ،جس تہانوں پیدا کیتا،اوہناں نوں وی،جو تہاتھوں
پہلاں ہوئے،تقویٰ انج تساں وس آسی۔(٢١)
ایہہ زمین تہاڈے واہتے اوس وچھائی،اوسے نے ای تہاڈے واہتے
چھتیا ہویا،بدلاں راہیں پانی گھلیا تے انج رزق تہاڈا بن کے پھل پھل والے
بوٹے اگے۔اس کر کے ناہ اللہ ورگا ہور کسے نوں جانو، سار تہانوں ساری۔
جے کر شک تہانوں اس وچ، اپنے بندے ول اساں جو نازل کیتا،انج دی
سورت اک لیاؤ،امدادی وی نال رلاؤ، اڈ اللہ توں،جے سچے او تے جے
کر سکیو ناہیں، تے ناہ ہر گز کر سکیو، فیر ڈرو اس ناروں،جس دا بالن بندے
پتھر ،ہے جیہڑی کفروناں واہتے بھخی بھخائی۔
خوش خبری اوہناں نوں دے دے جیہڑے دل ایمان لیائے،چنگے عمل
کمائے ،باغ اوہناں دے بھاگیں ہوسن،کول جنہاں دے وگدے پانی،اوتھے رزق پھلاں
دا اوہناں نوں جد کھانے واہتے مل سی،کہسن ایہہ تاں پہلاں
وی لگدا اے کھاہدے ہوئے،کیوں جے اوہناں دے نال رلدے ای ملدے
ملسیون نیں ،انجے سنگ بڑے ای ستھرے ملسیون گے،اوہ ہمیشہ اس وچ رہسن(٢٥)
اوپرے لگدے لفظ :
٭تقویٰ۔ نیکی، بھیڑے کماں توں بچنا ٭ناروں۔ اگ کولوں ٭ملسیون۔ ملن گے ، لبھن گے ٭سنگ ۔ ساک ، تینویاں

اللہ ناہ کچراندا اس توں،مچھر دی جے دے مثال اوہ ‘یاں اس توں وی ہینی شے
دی’کیوں جے مومن تے اللہ دے فرمائے نوں برحق جان،تے منکر
ایہہ آکھن، ایہو ا جئی مثالوں آخر اللہ داکی مطلب ہے سی، ایس طرح ای بہتے نیں
گمراہے جاندے تے نیں بوہتے سدھ راہ پے جاندے،پر گمراہے اوہوا
جاندے جیہڑے نافرمانے۔(٢٦)
اوپرے لگدے لفظ :
٭کچراندا۔ شرم کردا، ٭ہینی۔ نکی، چھوٹی، بے اوقاتی

یعنی جیہڑے دیندے نیں عہد اللہ نال،پہلاں آپوں پکیاں کر کے،
اتے تروڑن اللہ جس نوں آکھے جوڑو جگ دے وچ فساد مچاون اہناں گھاٹے
وچ ای رہنا ۔
اللہ توں ناہ منکر ہونا بنے تہانوں،سی نرجان تسی تے،اوس تہانوں جانی کیتا،
اوپرے لگدے لفظ :
٭نرجان۔ بے جان، ٭جانی کیتا۔ زندگی دتی، جیوندا کیتا

اوہ تہانوں مڑ مارے دا،فیر تہانوں زندہ کر سی،اوسے ول ای پرت تہاڈی۔
جو کجھ وی اُس دنیا وچ اے،پیدا کیتا اوس تہاڈے واہتے۔اسماناں ول ہویا
انجے ست اسمان اوہنے سترائے،ہر شے دا دل اس نوں۔
رب تیرے نے جدوں ملائک نوں دسیا سی،میں دنیا دے وچ خلیفہ اک بناون
لگاں آکھن لگے،کی بناسیں ،اس وچ جیہڑا بھنڈیاں پاسی،رت وگاسی،اسی
ترا ناں جپدے ،حمداں کر دے تے وڈیاندے تینوں اوس کہیا میں جو کُجھ
جاناں اوہ تسی ناہ جانو۔(٣٠)
اوپرے لگدے لفظ :
٭سترائے۔ بنائے، اُسارے ٭ول۔ جاچ، ٭بھنڈیاں۔ جھگڑے

آدم نوں اوس ہر اک ناں رکھن دی اٹکل دسی فیر اوہ چیزاں رب ملائک
اگے کر کے پچھیا،اہناں دے ناں دسو،جے سچے او۔
آکھن لگے،تیریاں توں ایں جانیں سانوں علم اس توں ناہ اگے جناں توں
اسانوں دتا بے شک توں علیم حکیم ایں۔
رب کہیا اے آدم دس دے اہناں دے توں ناں اہناں نوں،تے جد اوہناں
دے ناں اوہناں نوں اس دسے،رب فرمایا،کی میں ناہ سی کہیا تہانوں،میں
زمین اسماناں دے غیباں نوں جاناں،میں تہاڈی دس وی تے نردس وی
جاناں۔
اساں ملائک نوں جد ایہہ فرمایا،جھک جاؤ آدم دسے اگے،اوہ جھکے،ابلیس ناہ
جھکیا، ویہر کھلوتا،آکڑ کیتی،تے کفروناں دے سنگ رلیا،
اساں کہیا اے آدم رہ بہہ سنگ اپنے دے سنگ بہشتیں،ایتھوں کھاؤ جو جی
چاہے،جتھوں چاہے ،ہاں اس رکھ دے ول نہ ہونا،نہیں تاں نافرمانے
تھےسو۔
پر شیطان ہلا دتا سی اوہناں نوں اس گلوں،تے کڈھ کھڑیا اس رہتل چوں
اوہناں تائیں اوہنے۔
اساں کہیا ہن تسی نئیں اس رہتل جوغے نکلو ایتھوں اک دوجے دا ویر تہاڈے
وچ ہن پھٹسی ہن اک ویلے تیک تہانوں رہنا ہو سی سنگ مٹی دے تے
رزقے دی بھال ہن آپوں کرنی پیسی(٣٦)
اوپرے لگدے لفظ :
٭اٹکل دسی۔ جاچ سکھائی، ٭نردس۔ لا علمی، جانُوں نہ ہونا ٭رہتل۔ رہن دی تھاں، ٹھکانہ ٭ جوغے۔ قابل،

  • وچار پبلشرز