islamic-sources

  1. home

  2. book

  3. سورت یونس (مکی)پہلا حصہ

سورت یونس (مکی)پہلا حصہ

  • وچارپبلشرز
سورت یونس (مکی)پہلا حصہ
Rate this post
description book specs comment

بسم اللہ الرحمن الرحیم

الف لام را۔ اوس کتاب دیاں ایہہ گلاں حکمت ای حکمت اے جیہڑی،
کی تعجب لوکاں نوں اس اُتے ہے وے، اوہناں وچوں اک بندے تے
وحی اساڈے ولوں اتری۔ تاں جے لوکاں نوں دبکائے نالے مومن
لوکاں نوں ایہہ دیوے تسلی، اوہناں دے رب کول اچیرا رتبہ ہے وے
اوہناں واہتے۔ (بھاویں) کافر ایہو آکھن ظاہر ظاہر ایہہ کوئی ٹُونے
کرنے والا۔ بے شک رب تیرا اوہ جس نے چھے دِناں وچ اسماناں نوں تے
دھرتی نوں خلقایا سی۔ بیٹھ گیا مڑ تخت اُتے اوہ۔ہر کم دی واگ اس دے
ہتھ اے۔ اس دی اذنوں باجھ شفاعت کر ناہ سکدا کوئی۔ایہو اللہ ہے تہاڈا،
پالن ہار تہاڈا۔کرو عبادت اس دی۔کیوں ناہ مت تہانوں آوے۔
اوسے ول ای پرت تہاڈی سب دی ہے وے، اللہ دا ایہہ وعدہ سچا۔
بے شک اوسے ای پیدائش دا مُڈھ بنھیا۔ فیر اس نوں اوہ (روز قیامت)
دہرائے دا (گا) تاں جے ساہنویں تول جزا اوہناں نوں دیوے، جیہڑے ول
ایمان لیائے تے جنہاں نے چنگے عمل کمائے، تے جیہڑے انکاری
ہوئے اوہناں واہتے بلدا پیون نالے مار دُکھاوِیں کیوں جے کفر اوہناں اپنایا۔
اوہوا ذات اے جس ضیائی سورج کیتا تے نورانی چن نوں کر کے منزل،
منزل پینڈا اوہدے بھاگیں کیتا سال شماری وقت شماری واہتے۔ ایہہ جو
کجھ اللہ نے رچیا ہے منصوبہ اس دے پچھے۔ سوجھت والے لوکاں نوں
اوہ دسدا ہے نکھیڑے کر کے اپنیاں گلاں۔(٥)
اوپرے لگدے لفظ:
٭تعجب: حیرانی ٭دبکائے:ڈراوے ٭اچیرا :وڈھا ٭خلقایا: بنایا ٭اذن:اجازت ٭بلدا پیون: تتا پانی، ٭شفاعت:سفارش ٭پیدائش: جمن ٭ساہنویں تول:پورا تولنا، نتارا کرنا ٭ضیائی:روشن کرنا ٭بھاگیں:قسمت وچ،مقدر وچ ٭سوجھت:عقلاں والے

بے شک رات دناں دے آون جاون وچ تے اللہ نے جو کجھ وی رچیا ہے
زمین اسماناں دے وچ، (رب توں) ڈرنے والے لوکاں واہتے اس وچ پتے
پکیرے۔
ساڈے اگے پیشی نوں ناہ جیہڑے منن تے اس دنیا وچ ای ڈنگ ٹپانے
اُتے اوہ مگن نیں تے ایسے تے دل لا بیٹھے، تے اوہ لوکی جو آیات اساڈی
ولوں غافل ہے نیں انج دیاں دا اگ ای ڈیرا اوہناں دی کرنی دے پاروں،
تے جیہڑے ایمان لیائے تے کم اوہناں چنگے کیتے رب اوہناں دا راہ
اوہناں نوں پا دیوے دا (گا) اوہناں دے ایماناں پاروں، سو طرحاں دی نعمت
والے باغاں دے ول، کول جنہاں دے وگدے پانی۔
اوہناں وچ ترانہ اوہناں دا ہووے گا سبحان اللہ۔تے آپو وچ ملدے
ہوئے اوہ آکھن دے (گے) جیوو شالا۔تے گل بات اوہناں دی ایسے تے مُکّے دی (گی)
حمد اوسے دی کرنی پھبدی جو رب سب دا۔(١٠)
تے جے اللہ لوکاں نال کریندا اُنجے بھن چاہڑن دے وچ وی جلدی، جیکن
اوہناں تے رحمت کر دا تاں اوہناں دی مہلت کد دی مُکّی ہوندی۔پر اسیں
ڈھل دینے ہے واں اوہناں تائیں، ساڈے اگے پیش ہونے نوں جو ناہ منن
اپنی حد ٹپنی وچ ٹھیڈے کھانے واہتے۔(١١)
اوپرے لگدے لفظ:
٭رچیا: بنایا ٭پتے پکیرے: پکیاں نشانیاں ٭مگن: رُجھے ٭سبحان اللہ: ساریاں تعریفاں اللہ لئی ٭بھن
چاڑھرن: مارن، پھینٹی لاون ٭ڈھل: چھُوٹ ٭ٹھیڈے کھانے: رُلنا

ایہہ انسانی شیوہ سر تے آن بنے تاں سانوں واجے مارن لگدا پاسے پرنے،
بیٹھے کھلوتے، تے جد دُکھ مسافر کریئے اوہ انج ٹر دا جویں کدے وی دُکھ
دے ویلے ہال دہائی ساڈے اگے اوس نہ پائی۔ انجے اوہناں دے (باقی)
کرتوتاں اندر جیہڑے حداں ٹپن والے، کھچ اساں اک پائی ہوئی اوہناں
واہتے۔
اساں ہلاکت دے منہ پائیاں ہین تہاڈے توں پہلاں وی کنیاں نسلاں
جد اوہناں نے پٹھاں چائیاں۔حالاں اوہناں کول پیغمبر آئے،پکیاں
گلاں لے کے، پر اوہ منن ول نہ آئے مجرم لوکاں نوں کیتی دے پھل
اسیں اِنجے ای دیندے۔
اوہناں پچھوں اساں تہانوں دنیا دی چدھراہٹ دتی تاں جے تکئیے چالے کیہہ
تہاڈے ہوندے۔(١٤)
بول کھرے جد اوہناں اگے ساڈے ہین سنائے جاندے ساڈے اگے پیش
ہونے دا ناہ یقین جنہاں نوں، آکھن اس توں وکھرا وی قرآن لیا کے دس
خاں،یا ایسے دے وچ ای کر تبدیلی کوئی، کہہ دے کیہہ مجال میری اے،
اپنی مرضی دی تبدیلی اس دے وچ کراں میں کوئی، میں تے اُس دے
پچھے ٹرناں جو کجھ میرے ول اُتردا۔میں تے ڈردا وڈے دن دی ماروں
اپنے رب توں ایدھراودھر ہوندے ہوئے۔(١٥)
اوپرے لگدے لفظ:
شیوہ: کم، ویہار، ٭پٹھاں چائیاں: کنڈ کیتی ٭پھل: بدلہ ٭چدھراہٹ: پردھانی

تے ناہ جانو اوہ تہانوں اس دا کردا۔آخر اس توں پہلاں وی تاں میں
تہاڈے وچ ای عمر گذاری ہے وے۔ کیہ اندازہ اس توں ہوندا نہیں
تہانوں۔
تے ودھ اس توں کون دھروئی ہو سکدا اے، اللہ اُتے جھوٹھی گل نوں
جیہڑا تھپےّ۔ یا اس دی آکھی جھٹھیارے۔بے شک اللہ اوہناں دی نہ
پوری پاؤندا جیہڑے حداں ٹپن والے۔
تے اللہ نوں چھڈ کے لوکی اوہناں دی پئے کرن عبادت جیہڑے اوہناں
دے نہ مندے چنگے جوگے ،تے اوہناں دے بارے کہندے اللہ اگے
ایہہ سفارش ساڈی کرنے والے ہے نیں۔ کہہ دے کیہ اللہ نوں دسدے اوہ
گلاں او اسماناں تے دھرتی اندر جس دا اُس نوں آپ پتہ ناہ۔جیہڑا شرک
تسیں کر دے او اللہ اُچا تے پاک اس توں۔
تے سب لوکی پہلاں اکو کجھ ای ہے سن فیر خیال اوہناں دے پاٹے۔ جے
تریڑاں اہناں بارے ربوں ناہ کھل ہوندی، گل کدے دی اوہ اک پاسے
لگی ہوندی جس وچ لوکاں دے وچ پاڑاں۔(١٩)
اِنج دی وی گل لوکی کر دے کیوں عذاب نشانی اُس نوں کوئی اس دے
رب ناہ دتی۔کہہ دے، غیب اللہ دے کول اے تسیں اُڈیکو ۔ میں وی ہاں
اُڈیکنہار نال تہاڈے۔
اوپرے لگدے لفظ:
٭دھروئی: گناہگار ٭جھٹھیارے: جھوٹھا کرے

جد لوکائی رحمت ساڈی نوں چکھدی اے اپنے اُتے بیتی ہوئی تنگی پچھوں
تاں آیات اساڈی بارے گھُتکل سو طرحاں دی سوچے۔ کہہ اللہ بھانجی
موڑن وچ ترکھا ہے تہاڈے نالوں، لکھدے رہندے ہین اساڈے گھلے
ہوئے ہر اک چال تہاڈی۔(٢١)
اوہوا ای جل تھل اندر جیہڑا سفر کراؤندا ہے جے بیڑی وچ وی جد
ہوندے او، تے جدبیڑی سُدھ ہوا دی تھاپڑلے کے تر دی ہے وے خوش
ہوندے اس پاروں لوکی، آجاندی پر جد ہوا کَوڑی جس توں ٹھلاں اُٹھن
تھاں تھاں، سمجھ آوے نیں گھر گھتے، تاں مُڑ اللہ چیتے آوے سچے
دل توں، تے اوہ کہن بچائیں جے کر توں اسانوں ایس پھسن توں شکر کراں
دے (گے) ساری عمرے۔
تے جد اوہ بچا لیندا اے اوہ پھردے نیں دنیا دے وچ دھکے کر دے، لوکو
سن لؤ، دھکے شاہی ایہہ تہاڈی اپنے ای آپ اُتے پینی، چار دہاڑے
موجاں کر لؤ دنیا اُتے، خوب انگوری ہوئی،جس نوں کھاندے
بندے وی تے نیں ڈنگر وی۔ ایتھوں تک جے جوبن اُتے دھرتی
آوے تے رنگ کڈھے۔تے اس دے وسنیک ایہہ سمجھن ایہہ اساڈے
قبضے وچ اے۔اک راتیں یا اک دہاڑے امر اساڈا پر آ جاوے تے کر
دیوے وڈھی پیلی دے وانگ اُس نوں، کل جیویں نہ ایتھے ہے سی شے ای
کوئی، سوچن والے لوکاں دے کن پائیے انج پتے دیاں گلاں وکھ وکھ کر کے۔(٢٤)
اللہ سدے ہر کسے نوں چَینی ڈیرے والے پاسے۔پر اوہ جس نوں چاہندا
ہے وے سدھے راہ تے پادیندا اے۔
چنگے کم جنہاں نے کیتے چنگا پھل اوہناں نوں ملسی کُجھ وادھا وی ملسی۔
ناہ منہ کالے ناہ خواری ای ہووے دی (گی) ۔جنت واسی ایہو لوکی۔ دائم
اوہناں اوتھے رہناں۔
ہے پر جیہڑے لوکاں نے کم مندے کیتے مندا اوہناں نوں ملسی
اوہناں دے کرتوتاں ورگا اوہناں دے مونہاں تے ذلت۔اللہ کولوں
اوہناں نوں نہ ہوسی بچانے والا کوئی۔رات ہنھیری دے جیوں ٹوٹے ہون
اوہناں دے چہرے کجے۔ ایہہ لوکی نیں اگ دے واسی۔ دائم اس دے
وچ اوہ رہسن۔(٢٧)
تے جد اسیں اکٹھے سبھناں نوں اٹھواساں۔ فیر آکھاں دے (گے) اوہناں تائیں
جیہڑے لوکاں شرک کمایا، رہو کھلوتے اپنی تھاں تے سنے شریکاں۔ فیر
اوہناں دے وچ تریڑ اسیں پادیساں۔تے آکھن دے (گے) آپ شریک
اوہناں دے جیہڑے، پوجا کدوں اساڈی سی تُسیں کر دے، رب تہاڈا
ساڈے وچ اے شاہد کافی، سانوں اس دی خبر نہ اکا تسیں اساڈی پوجا
کر دے ہوندے ہے سی۔(٢٨)
اوپرے لگدے لفظ:
٭ذلت: خواری ٭کجے: ڈھکے ہوئے

اس ویلے ہر کوئی اپنے کیتے دی سٹ تھلے ہوسی۔تے سب اپنے اللہ اگے
پیش ہوون دے (گے) جیہڑا مولا ہے اوہناں دا حقا سچا تے بھل جائے چترائی
سب اوہناں نوں۔
پُچھ اوہناں نوں اسماناں تے دھرتی اندر رزق اوہناں نوں کون ایں دیندا۔
کناں تے اکھیاں دے اُتے کس دا وس اے۔موئی (شے) چوں کیہڑا ہے
وے جندل کڈھدا۔تے کیہڑا اے جگ دی واگ سنبھالنہارا۔ اوہ آکھن دے (گے)
اللہ ای اے۔ مُڑ پُچھ اُس دی اوہ کیوں من کے ٹردے ناہیں۔
سمجھو اللہ ایہو ای تاں ہے تہاڈا، حقا سچا رب تہاڈا۔ حق توں پچھے کیہ رہ جاندا
گمراہی دے باجھوں۔کدھر نوں اوہ موڑے کھاندے۔
انج رب تیرے دی گل نافرمانے لوکاں بارے نتری جے من ٹرنے
والے اوہ ناہ۔(٣٣)
پُچھ اوہناں نوں کون تہاڈے ہے شریکاں وچوں جس نے پہلاں سی ایہہ
رچن رچایاتے فیر اس نوں دہرانا سو، کدھر اوہ پئے ٹھیڈے کھاندے۔
کون تہاڈے ہے شریکاں وچوں پُچھ نیں جیہڑا حق دے راہ پا سکدا ۔دس
دے ایہہ اللہ ای ہے اے جیہڑا حق دی راہے پائے ۔کیہ مُڑ اُس دے
پچھے لگنا چنگا ہے وے جیہڑا حق دی راہے پائے یا اوہ جیہڑے اُنگلی پھڑ
کے آپوں راہے پیندے۔ وگ گئی اے کیہ تہانوں کیکن گل مکاندے ہے
اوہ۔(٣٥)
اوپرے لگدے لفظ:
٭چترائی:چالاکی ٭موئی: مری ہوئی، ٭جندل: جیوندا، ٭کیہ وگ گئی: کیہ ہو گیا۔ ٭کیکن: کیویں

  • وچارپبلشرز