islamic-sources

  1. home

  2. book

  3. سورۃ الفتح (مدنی)

سورۃ الفتح (مدنی)

سورۃ الفتح (مدنی)
Rate this post
description book specs comment

مترجم:شریف کنجاہی

بسم اللہ الرحمن الرحیم

جِت اساڈے ولّوں کُھلم کُھلی تیرے بھاگیں ہوئی۔ (١)
تاں جے اگلے پِچھلے سارے تیرے پِچھے بدّھے ہوئے الزاماں بہتاناں
اُتوں تیرا دامن پاِک ہو جاوے تے رب اپنی نعمت تیرے تے پُوری کر
دیوے تے تینُوں اوہ (دِینی غلبے والے) سِدھے راہ تے پائے۔
اج اللہ نے تینُوں وڈی نُصرت (کامیابی) دِتی۔
اوسے نے ای مومن لوکاں دے قلباں نُوں اِک سکون عطا کِیتا سی۔
تاں جے اگے توں وی ودھ کے ہووے نیں ایمان پکیرا۔ اسماناں دی تے
دھرتی دی قوت اللہ دے اپنے وس اندر، اللہ آپ علیم حکیم اے۔
ایسے جِت توں ای ایہہ صورت پیدا ہوئی مومن مرداں زالاں اُتے
جنتاں دے دروازے کُھلے وگدے پانی ہیٹھ جِنہاں دے اُنہاں اوتھے
دائم رہنا۔ سِروں اُنہاں دے بھار وی لاہے کوتاہیاں دے اللہ، تے اُس
دے نزدیک بڑی ایہہ بامُرادی (انساناں دی) ۔(٥)
ایسے راہیں دو رنگیاں دو رنگنیاں نُوں۔ شرکیلاں شرکیلنیاں نُوں اللہ
بارے مندے ظن جِنہاں دے اندر وِچ عذاب اُس پا دِتا اے اوہ
مُصیبت دے وِچ پھاتھے۔ غضب اللہ دا نالے اُس دی لعنت ہے اُنہاں
دے اُتے اُنہاں واہتے دوزخ (رب) بھخا دِتا اے ایدوں مندا واسا کیہڑا
تے اسماناں دی تے دھرتی دی ہر قوت اللہ دے وس اپنے ہے وے
بیشک اللہ آپ عزیز حکیم اے۔ (٧)
تینُوں گھلیا سچی گل سُنانے والا دِل نُوں ڈاہی دینے والا نالے جھونن والا
کر کے تاں جے منن ول آجاؤ اللہ اتے رسول اُس دے نُوں، لوکو ویکھو
ساتھ دئیو اللہ دا رب رب کرو تے شام سویرے اوس دِیاں تسبیحاں گاؤ۔
تیری بیعت جِنہاں نے کیتی سچ تاں ایہہ وے بیعت اللہ دی
اُنہاں کیتی اُنہاں دے ہتھاں دے اُتلے پاسے ہے سی ہتھ اللہ دا ایہہ
ہتھ اِنج پھڑا کے جِس نے پِچھے کِھچیا اُس کِھچ دا بھار اُس دے اُتے تے جِس
قول نباہیا جیہڑا اللہ نال اُس کیتا اُس نُوں اجر گھنیرا مِلسی۔
ہُن آکھن گے تینُوں بدُّو لمک رہے سن جیہڑے پِچھے اَینویں اپنے
مالاں تے گھریاں دے جنجالاں سانُوں ڈکّی رکھیا۔ رب دے کولوں منگ
معافی ساڈے واہتے، اوہ اُتوں ای اُتوں کہندے اندروں مُول نہ کہندے
آکھ اُنہاں نُوں اللہ اگے حق تُہاڈے وِچ کِسے دی چلدی ناہی اِک رتّی وی
جے اوہ ڈاڈھا ہتھ تُہاڈے واہتے رکھے یا ہتھ ہولا رکھے تے اللہ توں بُھلّے ناہیں
جو کرتُوت تُہاڈے۔
تُسیں تے سمجھے بیٹھے ہے سی ہُن رسول تے اُس نُوں منن والے لوکی مت
گھراں نُوں پرتے تے اِس گلّوں دل تُہاڈے وِچ سی چال، سوچی سوچ
تُساں ات بھیڑی ستیا ناس تُہاڈا۔
تے جِس اللہ نُوں تے اُس دے پیغمبر نُوں منناں ناہیں (ناہ اوہ منّے)
کفروناں دے واہتے اگ نُوں اساں بھخایا ہویا ہے وے۔ (١٣)
اسماناں دی تے دھرتی دی شاہی ساری ہتھ اللہ دے جِس نُوں چاہے
اوٹ اوہ دیوے جِس نُوں چاہے اوہ عذاباں دے وِچ پائے۔ بے شک اللہ
اوٹاں دینے والا مِہراں والا ہے وے۔
پِچھے لمکے ہُن آکھن گے جد تُسیں لُٹ مال کرن نُوں جاسو، سانُوں وی
تاں چُھٹی دینا پِچھے پِچھے آ جانے دی۔ اوہ چاہندے نیں اللہ دی آکھی نُوں
بدلن، کہہ دے نال اساڈے مُول تُساں ناہ جانا ایہو ای گل اللہ پہلاں وی
آکھی سی، فیر آکھن گے تُسیں اساڈے دوکھی ہے او کیوں جے گھٹ ای
اُنہاں وِچوں سمجھ جِنہاں نُوں۔
لمک رہے تھاں واساں نُوں تُوں ایہہ گل کہہ دے سدّیا جاسی ویکھو
جھبدے اِک لڑاکی قوم اے جِس دے نال بِھڑن دے واہتے اُنہاں نال
لڑائی کردے جانا جے جد تائیں ہتھیار نہ سُٹن جے مُڑ تُساں اطاعت (گل منّنا)
کیتی اللہ اجر تہانُوں دیسی واہوا چنگا تے جے فیر تُساں مُونھ موڑے پہلے
وانگوں، ڈاہڈے اوکھے کرنیوالے تُسیں عذاباں دے وِچ پَیسو۔
انھا ہووے لنگا ہووے ماندہ ہووے بَجھ ناہ اُس نُوں (لڑنے
بارے) جِس وی اللہ اَتے رسول اُس دے دی آکھی منّی اللہ اُس نُوں
جنت دے وِچ داخل کرسی تھلے جِس دے وگدے پانی تے جیہڑا مُونھ
موڑے اوہنُوں اوکھا کرنے والے اوہ عذاباں دے وِچ پاسیں۔ (١٧)
اللہ اودوں ای اُنہاں تے ہو ونجیا سی راضی مومن لوکاں جد ہتھ رکھ
کے ہتھ تیرے تے رُکھ دے ہیٹھاں قول سی کیتا اُنہاں دے اندر دی
گل نُوں جان لیا سی اوہنے تے اُنہاں دے دل نُوں اوس تسلی دِتی تے
اِک جھب ای ہونے والی جِت دی وی خوش خبری۔ (١٨)
جِس وِچ لوٹی دا مال آسی ہتھ اُنہاں دے رَج کے تے اللہ اے زوراور
تے نالے حکمت والا وی اے۔
اللہ کِنِّیاں ہور اجے لُٹ مالاں دا اے کارا کیتا ہویا لگنا ہتھ تُہاڈے
جِنہاں، ایہہ تہانُوں اوہنے وعدے توں پہلاں ای ہتھ پھڑائی، لوکاں
دے ہتھ اوس تُہاڈے ول اُٹھنے بند کِیتے تاں جے مومن لوکاں واہتے
ایہہ جِت ہووے اِک نشانی تے پا دیوے اوہ تہانُوں (اسلامی غلبے دی)
سدھی راہ تے، ہور وی لُٹاں ہے نیں واہ جِنہاں تے لگی اجے تُہاڈی ناہیں
اللہ ہے ضرور اُنہاں نُوں گھیرے دے وِچ رکھیا ہویا بے شک اللہ ہر کم
کرنے تے قادر وے۔
ایہہ کافر جے نال تُہاڈے بانہواں دی ازمائش کر دے۔ اُنہاں
جاندے ناہ دِسنا سی تے اُنہاں دا ناہ کوئی ساتھی ناہ ہونا سی رَلنے والا۔
اللہ دا دستور ایہہ مُڈھوں ٹُردا آیا تُوں اللہ دا ایہہ دستور کدے نہ
تکسیں ہور ہو جاندا۔
اوسے نے ای ہتھ تُہاڈے تے اُنہاں دے اٹُھنوں ڈکّے وِچ مکّے
دے، اِنجے ہتھ تُہاڈے اُنہاں اُتے اُٹھنوں وار تُہاڈی جدوں وڈیری تھی
ونجی سی اللہ دی اکھ ہر تُہاڈی کرنی اُتے۔ (٢٤)
ایہہ نگلے لوک ای تینُوں ڈک کھلوتے جا ادب دی جیہڑی مسجد ہے اُس
دے وِچ جانوں، قربانی دے ڈنگراں نُوں وی تھاں سر اُنہاں جان نہ دِتا
(ایہہ گل سی اِس کر کے بِیتی) مکے دے وِچ مومن لوکی، کیہ بندے کیہ
بندِیاں رہندے (حملے کر کے) بے خبری وِچ وَلے ناہ جاون اوبھی
کِدھرے تے لاعلمی وِچ ای کِدھرے ماڑ تُہاڈے متھے لگے تے اِنج اللہ
جِس نُوں چاہے اپنی رحمت ہیٹھ لیاوے ہاں جے اوہ ول کفروناں توں وکھ
ہو جاندے۔ اساں بڑے ای اوکھا کرنے والے اِک عذاب اندر کفروناں
نُوں پا دینا سی۔ (٢٥)
بُوڑاں والے ہُوڑپُنے نُوں جد کفروناں دل وِچ رکھیا اللہ نے سی اپنے
ولّوں پیغمبر تے نالے اپنے باقی مومن لوکاں اُتے اِک سکون جہیا اُس ویلے
نازل کیتا تے اُنہاں نُوں ثابت رکھیا تقوے دی گل اُتے اُنہاں نُوں
جچدا سی ایہوا اوہوا ای اِنج کر سکدے سی بے شک اللہ ہر اِک شے دا جانن والا
اللہ اپنے پیغمبر دا سُفنا بالکل سچا کر کے دس دِتا سی، ایہہ جے اُنہاں
کعبے وِچ ہونا ایں داخل جے منظور خدا نُوں ہویا۔ نال امن دے
سرمنواندے یا کتراندے تے بے دھڑکے اوہ جانے جو تُسیں ناہ جانو۔
اُس توں وکھ وی ہور اِک اُس نے جِت تُہاڈے نیڑے کیتی۔
اوسے نے ایں گھلیا سی پیغمبر اپنا اِک کتاب ہدایت والی تے اِک دِین
سُچیرا دے کے تاں جے اُس نُوں باقی سارے دِیناں اُتے غالب کر دے
تے نگران اللہ دا ہونا ہے اِس بارے کافی۔ (٢٨)
ایہہ محمد اللہ دا پیغمبر جیہڑا تے سب اُس دے سنگی، کفروناں دے
واہتے کَوڑے تے اِک دوجے واہتے مٹھے۔ تُوں اُنہاں نُوں تکدا ہے ویں
جُھکدے ہوئے سجدے کر دے اللہ کولوں فضل اُس دا اوہ منگدے تے
خوشنودی اُس دی، اُنہاں دے متھیاں دے اُتے سجدے کر کر محراباں
ہُن پئیاں ہوئیاں وِچ تورات وی ہے وے ایہوا دسّی ہوئی صِفت اُنہاں
دی تے انجیل اندر وی ایہوا۔ اُس پَیلی دے وانگوں اوہ نیں جیہڑی
پہلاں کڈھ دی اے انگوری فیر اوہنُوں کُجھ قوت ملدی تے اوہ پَلدی
جاندی، فیر کھلو جاندی اے ٹاندے دے اوہ سِر تے تے اِنج گڈن والے دا
دِل خوش ہو جاندا تے کفروناں نُوں لگ جاندا ساڑا۔ اللہ وعدہ کیتا ہویا نال
اُنہاں دے جیہڑے ول ایمان لیائے نالے چنگے عمل کمائے۔ اُنہاں
نُوں ای اوٹ الٰہی ملنی ہے وے نالے اجر گھنیرا۔ (٢٩)