islamic-sources

  1. home

  2. book

  3. سورۃ الممتحنہ (مدنی)

سورۃ الممتحنہ (مدنی)

سورۃ الممتحنہ (مدنی)
2.4 (48%) 10 votes
description book specs comment

مترجم: شریف کنجاہی

بسم اللہ الرحمن الرحیم

اے ایمان لیائے لوکو جے تُسیں راہ میرے اُتے ٹُرے جہاد کرن دی
خاطر تے میری خوشنودی واہتے، اُنہاں تائیں یار گِنو ناہ جیہڑے دشمن
میرے اتے تُہاڈے ہے نیں، کیہ اُنہاں ول یار پُنے دا ہتھ ودھاؤ جیہڑے
نابر ہو بیٹھے نیں اوس حق بارے جیہڑا کول تُہاڈے آیا، نالے اُنہاں سنے
تُہاڈے پیغمبر نُوں دیسوں کڈھیا۔ اِس گل اُتوں جے ایمان تُساں لے آندا
سی اللہ تے جیہڑا رب تُہاڈا سب دا، چوری چوری اُنہاں دے ول لکھ پیار
سُنیہڑے گھلو مینُوں تے معلوم تُہاڈی اوہلی تے ان اوہلی ساری تے جِس
نے ایہہ چالا رکھیا اوہ تُہاڈے وِچوں سمجھو سِدھے راہ توں پاسے ہویا۔
جے قابو کر لین تہانُوں، دشمن والا اُنہاں دا ورتارا ہوسی نال تُہاڈے۔
ہتھ اُنہاں دے ول تُہاڈے لمے ہوسن تے جیبھاں وی ماڑ کرن نُوں
کُھلسن اُنہاں دی تے ایہہ مرضی ہے اُنہاں وانگوں کافر تھیوو۔
کم تہانُوں مُول ناہ دیسی ساکا چاری اِک دُوجے دی نال اولاد تُہاڈی،
روز قیامت وچ تُہاڈے اللہ آپ نیائیں بنسی تے اکھ اُس دی ہے تُہاڈے
کمّاں اُتے۔
ابراہیم سنے سنگیاں دے سوہنا اِک نمونہ سمجھو اپنے واہتے اُنہاں
صاف ایہہ قوم اپنی نُوں کہہ دِتا سی سیر تُہاڈے نال ناہ ساڈی ناہ نال اُس
دے جِس دی تُسیں عبادت کردے اللہ نُوں اِک پاسے کرکے اسیں تُہاڈی
من دے ناہیں ساڈے اُتے تُہاڈے وچ ہُن پَے گئی لِیک ہمیشہ واہتے
نالے رہنی ایں ناچاقی اودوں تائیں اللہ نُوں جد تیک ناہ منّو جیہڑا اِکو اِک
اے ہاں پر اپنے پیو نُوں ابراہیم (نبی) دا ایہہ کہنا اِک وکھری گل سی جے
میں تیری بخشش واہتے اللہ اگے عرض کراں گا پر ایہہ میرے وس وِچ ناہیں
اللہ کولوں تیرے بارے عرض اپنی منوا وی سکاں، اے رب ساڈے
تیرے پرنے گڈ اساڈی تیرے ول ای مُونھ اساڈے تیرے ول ای
پرت اساڈی۔
اے رب ساڈے کفروناں دے ہتھ لمیرے ہون ناہ دیویں ساڈے
بھاء دے۔ سانُوں اپنا اوٹل رکھیں اے رب ساڈے تُوں عزیز ایں تُوں
حکیم ایں۔
سوہنا اِک نمونہ اوہ تے ہین تُہاڈے لوکاں واہتے بلکہ اُنہاں سبھناں
واہتے آس جِنہاں نُوں اللہ کولوں تے چھیکڑ دے دن کولوں ایں تے جِس
نے مُونھ پھیری کیتی اوہ ایہہ سمجھن اللہ نُوں ناہ لوڑ اُنہاں دی اوہ تاں
آپوں ای منصوبے اپنے توڑ اپڑاون والا۔
ایہہ ممکن اے اج جِنہاں دے نال تُہاڈی اَن بَن ہے وے اللہ
اُنہاں نال تُہاڈی گُوہڑ کرا دے اوہ ہر کم دی قُدرت والا غفور اے اوہ
رحیم اے۔(٧)
اللہ اِس توں ٹھاکے ناہیں جے ول ورتو نال اُنہاں دے تے ناہ بے
وِہارے ہووو کل جِنہاں نے دِین اُتوں ناہ ول تُہاڈے ڈانگاں چائیاں تے
ناہ دیسوں اوہ تہانُوں کڈھ دینے وچ شامل ہے سن اللہ آپ وِہاری لوکاں
نُوں گن دا اے چنگا۔ (٨)
اوہ ضرور اُنہاں دے نال یرانے اُتوں روکے کل جِنہاں نے
دین تُہاڈے بارے کیتی ول تُہاڈے ڈانگ اُلاری تے دیسوں بے دیس
کرن وچ ہتھ جِنہاں دا (سِدھم سِدھا) تے اِس دیس نکالے دے وچ اِک
دُوجے دی بانہہ بنے سی اُنہاں دے نال یاری پانے والے لوکی رب دے
کھاتے حدّ ٹپیالے۔
اے ایمان لیائے لوکو کول تُہاڈے جد آجاون ہجرت کر کے مومن
زالاں اُنہاں دی پُن چھان ضروری کیوں جے اُنہاں دے ایماناں دی
حالت اللہ ای جانے تے ہو جائے جدوں نتارا اوہ مومن نیں اُنہاں نُوں ناہ
کفروناں دے ول پرتاؤ اوہ حلال ناہ اُنہاں اُتے ناہ حلال اوہ اُنہاں
اُتے، مہر اُنہاں نُوں دِتے ہوئے کافر کھسماں ول پرتاؤ اُنہاں نال نکاح
کرن تے ربّوں بھار پوے نہ کوئی جے کر مہر ادا کر دیوو جیہڑے اُنہاں
دے سِر ہوون اِنجے کافر رنّاں توں وی تُسیں نکاح دی پھاہی وچ ناہ پھاہی
رکھو۔ مہر تُساں جو دِتے ہوون موڑ لوو تے کفروناں دے مہر اِنجے ای آپ
تُسیں وی موڑو حُکم اللہ دا ایہوا ہے وے اوہ نیائیں وچ تُہاڈے، بے شک
اللہ آپ علیم حکیم اے۔
جے تُہاڈیاں زوجاں وِچوں مہر کِسے دا کفروناں دے ذمے ہووے تے
موقع ہتھ آجاوے جے اُس پیسے چوں دِتے ہوئے مہراں جِنّا دئیو اُنہاں
نُوں جیہڑے رنّاں نُوں چھڈ آئے مہراں دے پرتیون باجھوں ویکھو اوس
خدا دا خوف دِلاں وچ رکھو جِس اُتے ایمان لیائے۔ (١١)
اے نبی جد کول تیرے ایماننیاں ایہہ آکے آکھن جے اللہ دے نال
شریک رلاسن ناہیں مُول کِسے نُوں تے اوہ چوری یاری کرسن ناہ بدکاری
نہ اولاداں دا گھٹ بھرسن (کِسے طرحاں وی) ناہ ایں اپنے ہتھاں پَیراں وچ
دی تھاں دے بارے جُھوٹھ اوہ گھڑ سن کوئی ناہ ایں حُکم عدُولی کرسن سِدھی
گل وچ تاں اُنہاں نُوں بیعت کر لے۔ تے اللہ توں اُنہاں واہتے منگ
اوٹاں وی کر تُوں بے شک اللہ آپ غفور رحیم اے۔
اے ایمان لیائے لوکو رب دے غضبے لوکاں نُوں ناہ یار بناؤ اوہ تاں
چھیکڑ توں بے آسے جئیوں بے آسے کافر قبریں جا پیاں دے بارے۔